ന്യൂഡൽഹി: ഒഡീഷയിലെ ജലേശ്വറിൽ കത്തോലിക്കാ വൈദികർക്കും സന്യസ്തർക്കും നേരെയുണ്ടായ ഹിന്ദുത്വവാദികളുടെ ആക്രമണത്തെ അപലപിച്ച് ഭാരത കത്തോലിക്ക മെത്രാൻ സമിതി (സിബിസിഐ). ഈ ആക്രമണം ഒറ്റപ്പെട്ട ഒരു സംഭവമല്ല, മറിച്ച് ക്രിസ്ത്യൻ ന്യൂനപക്ഷങ്ങൾക്കെതിരായ അസ്വസ്ഥതയുണ്ടാക്കുന്ന അക്രമത്തിന്റെ ഭാഗമാണ്, ഇത് രാജ്യത്ത് വർദ്ധിച്ചുവരുന്ന അസഹിഷ്ണുതയുടെ അന്തരീക്ഷത്തെ പ്രതിഫലിപ്പിക്കുന്നതാണെന്നും സിബിസിഐ ഇന്ന് പ്രസ്താവിച്ചു.
ന്യൂനപക്ഷങ്ങളുടെ ഭരണഘടനാ അവകാശങ്ങളുടെയും മാനുഷിക അന്തസ്സിന്റെയും നഗ്നമായ ലംഘനമാണ് ഇത്തരം ആക്രമണങ്ങൾ. വർദ്ധിച്ചുവരുന്ന ആൾക്കൂട്ട അക്രമ പ്രവണത എല്ലാ സമുദായങ്ങളുടെയും സുരക്ഷയ്ക്കും, സമാധാനപരമായ സഹവർത്തിത്വത്തിനും ഗുരുതരമായ ഭീഷണി ഉയർത്തുന്നു. കുറ്റവാളികളെ തിരിച്ചറിഞ്ഞ് പ്രോസിക്യൂട്ട് ചെയ്യുന്നതിനും, എല്ലാ ന്യൂനപക്ഷ സമുദായങ്ങളുടെയും സംരക്ഷണം ഉറപ്പാക്കുന്നതിനും വേഗത്തിലും നിർണ്ണായകമായും നടപടിയെടുക്കണമെന്ന് സിബിസിഐ ഒഡീഷ സർക്കാരിനോട് ആഭ്യർത്ഥിച്ചു.
ഭരണഘടന പ്രകാരം ഉറപ്പുനൽകുന്ന മൗലികാവകാശങ്ങൾ സംരക്ഷിക്കാൻ അധികാരികളോട് ഞങ്ങൾ അഭ്യർത്ഥിക്കുന്നു, അതുവഴി ഓരോ പൗരനും ഭയമില്ലാതെ ജീവിക്കാനും അവരുടെ വിശ്വാസം ആചരിക്കാനും കഴിയും. സാഹചര്യം സൂക്ഷ്മമായി നിരീക്ഷിക്കുന്നത് സിബിസിഐ തുടരും, കൂടാതെ എല്ലാ പൗരന്മാരുടെയും, പ്രത്യേകിച്ച് ക്രിസ്ത്യൻ സമൂഹത്തിന്റെ, അവകാശങ്ങളും, അന്തസ്സും, സുരക്ഷയും സംരക്ഷിക്കുന്നതിനുള്ള പ്രതിബദ്ധതയിൽ ഉറച്ചുനിൽക്കുമെന്നും ഭാരത കത്തോലിക്ക മെത്രാൻ സമിതിയുടെ പിആർഒ ഫാ. റോബിൻസൺ റോഡ്രിഗസ് പ്രസ്താവിച്ചു.
കഴിഞ്ഞ ദിവസം ജലേശ്വർ ഇടവകയ്ക്ക് കീഴിലുള്ള ഗംഗാധർ ഗ്രാമത്തിന് സമീപം രണ്ട് കത്തോലിക്ക വൈദികരെയും രണ്ട് കന്യാസ്ത്രീകളെയും അൽമായനെയും മതപരിവർത്തനം നടത്തിയെന്ന വ്യാജ ആരോപണം ഉന്നയിച്ചാണ് തീവ്രഹിന്ദുത്വ സംഘടനയായ ബജ്റംഗ്ദൾ ആക്രമിച്ചത്.
