പി.എസ്. ചെറിയാൻ
ഇന്നത്തെ കുട്ടികൾ വളരുന്നത് മാതാപിതാക്കൾ വളർന്നുവന്ന കാലഘട്ടത്തിൽനിന്ന് തികച്ചും വ്യത്യസ്തമായ സാഹചര്യങ്ങളിലാണ്. സാങ്കേതികവിദ്യയും സോഷ്യൽ മീഡിയയും ഇന്റർനെറ്റും പുതിയ ജീവിതശൈലികളും കുട്ടികളുടെ ചിന്തകളെയും പെരുമാറ്റങ്ങളെയും സ്വാധീനിക്കുന്നു. അതുകൊണ്ടുതന്നെ ഇന്നത്തെ മാതാപിതാക്കൾ കുട്ടികളെ വളർത്തുമ്പോൾ പഴയകാല ശിക്ഷണരീതികൾ മാത്രം ആശ്രയിക്കാതെ പുതിയ കാലത്തിന്റെ മാനസികവും സാമൂഹികവുമായ പ്രത്യേകതകൾ മനസ്സിലാക്കേണ്ടതുണ്ട്.
പുതിയ കാലത്തെ പേരന്റിംഗ്
പേരന്റിംഗ് എന്നത് കുട്ടികൾക്ക് ഭക്ഷണവും വസ്ത്രവും വിദ്യാഭ്യാസവും നൽകുക മാത്രമല്ല; അവരുടെ വ്യക്തിത്വവും സ്വഭാവവും ആത്മവിശ്വാസവും രൂപപ്പെടുത്തുന്ന പ്രക്രിയയാണ്. കുട്ടികളെ നിയന്ത്രിക്കുന്നതിനേക്കാൾ അവരെ മനസ്സിലാക്കാനും നയിക്കാനും മാതാപിതാക്കൾക്ക് കഴിയണം.
കുട്ടികളുടെ അഭിപ്രായങ്ങൾ കേൾക്കുക, അവരുടെ താൽപര്യങ്ങളെ മാനിക്കുക, സ്വാതന്ത്ര്യത്തോടൊപ്പം ഉത്തരവാദിത്വം പഠിപ്പിക്കുക എന്നിവ പുതിയ കാലത്തെ പേരന്റിംഗിന്റെ പ്രധാന ഘടകങ്ങളാണ്. അമിതമായ നിയന്ത്രണവും പൂർണമായ സ്വാതന്ത്ര്യവും ഒരുപോലെ ദോഷകരമാണ്. സ്നേഹവും അച്ചടക്കവും ഒരുമിച്ചുള്ള സമീപനമാണ് ആവശ്യം.
കുട്ടികളുടെ മാനസിക പ്രത്യേകതകൾ
ഇന്നത്തെ കുട്ടികൾക്ക് അറിവും വിവരങ്ങളും ലഭിക്കാനുള്ള അവസരങ്ങൾ കൂടുതലാണ്. എന്നാൽ അതിനൊപ്പം താരതമ്യം, മത്സരബുദ്ധി, പഠനസമ്മർദം, ഏകാന്തത, അംഗീകാരത്തിനായുള്ള ആഗ്രഹം തുടങ്ങിയ വെല്ലുവിളികളും വർധിക്കുന്നു.
- സ്വന്തം വ്യക്തിത്വം അംഗീകരിക്കപ്പെടണമെന്ന് അവർ ആഗ്രഹിക്കുന്നു.
- മാതാപിതാക്കൾ തങ്ങളെ മനസ്സിലാക്കുന്നില്ലെന്ന തോന്നൽ ഉണ്ടാകാം.
- ചെറിയ വിമർശനങ്ങൾ പോലും വലിയ മാനസിക മുറിവുകളായി മാറാം.
- സുഹൃത്തുക്കളുടെയും സോഷ്യൽ മീഡിയയുടെയും സ്വാധീനം കൂടുതലായിരിക്കും.
- സ്നേഹവും അംഗീകാരവും സുരക്ഷിതത്വവും അവർക്ക് ആവശ്യമാണ്.
കുട്ടികളുടെ പെരുമാറ്റത്തിലെ മാറ്റങ്ങൾ വെറും അനുസരണക്കേടായി കാണാതെ അതിനു പിന്നിലെ മാനസിക കാരണങ്ങൾ മനസ്സിലാക്കാൻ മാതാപിതാക്കൾ ശ്രമിക്കണം.
കുട്ടികളുടെ പ്രശ്നങ്ങൾ കൈകാര്യം ചെയ്യേണ്ട വിധം
കുട്ടികൾ തെറ്റുകൾ ചെയ്യുമ്പോൾ ഉടൻ ശിക്ഷിക്കുന്നതിനുപകരം എന്തുകൊണ്ടാണ് അങ്ങനെ സംഭവിച്ചതെന്ന് അന്വേഷിക്കണം. അവരുടെ പ്രശ്നങ്ങൾ തുറന്നു പറയാൻ കഴിയുന്ന സുരക്ഷിതമായ കുടുംബാന്തരീക്ഷം സൃഷ്ടിക്കണം.
പഠനത്തിലെ പരാജയം, സൗഹൃദങ്ങളിലെ പ്രശ്നങ്ങൾ, മൊബൈൽ ഫോൺ ഉപയോഗം, പ്രണയബന്ധങ്ങൾ, നിരാശ, ആത്മവിശ്വാസക്കുറവ് തുടങ്ങിയ വിഷയങ്ങളിൽ കുട്ടികളുമായി തുറന്ന സംഭാഷണം നടത്തണം.
അവരുടെ പ്രശ്നങ്ങളെ നിസ്സാരവത്കരിക്കരുത്. ആവശ്യമായ സന്ദർഭങ്ങളിൽ അധ്യാപകരുടെയും കൗൺസിലർമാരുടെയും മനഃശാസ്ത്ര വിദഗ്ധരുടെയും സഹായം തേടണം.
വാക്കുകൾ സൂക്ഷിക്കുക
മാതാപിതാക്കളുടെ വാക്കുകൾ കുട്ടികളുടെ വ്യക്തിത്വത്തെ രൂപപ്പെടുത്തുന്നതിൽ വലിയ പങ്കുവഹിക്കുന്നു. കോപത്തിൽ പറയുന്ന വാക്കുകൾ പോലും കുട്ടികളുടെ മനസ്സിൽ ദീർഘകാലം മുറിവുകളായി നിലനിൽക്കാം.
‘നിനക്കൊന്നും കഴിയില്ല’, ‘നീ ഒരു പരാജയമാണ്’, ‘മറ്റുള്ള കുട്ടികളെ കണ്ടുപഠിക്ക്’ തുടങ്ങിയ വാക്കുകൾ കുട്ടികളുടെ ആത്മവിശ്വാസം തകർക്കും.
കുട്ടികളുടെ തെറ്റുകളെ തിരുത്തണം; എന്നാൽ അവരുടെ വ്യക്തിത്വത്തെ അപമാനിക്കരുത്. കുറ്റപ്പെടുത്തുന്നതിനുപകരം പ്രോത്സാഹിപ്പിക്കുക. താരതമ്യം ചെയ്യുന്നതിനുപകരം അവരുടെ കഴിവുകളെ തിരിച്ചറിയുക.
മാതാപിതാക്കളുടെ വാക്കുകൾ കുട്ടികൾക്ക് ആത്മവിശ്വാസത്തിന്റെ ചിറകുകളാകാം; അതുപോലെ ജീവിതകാലം മുഴുവൻ വേദനിക്കുന്ന മുറിവുകളുമാകാം.
പേരന്റിംഗ്: ബൈബിൾ നൽകുന്ന ഉപദേശം
കുട്ടികളെ വളർത്തുന്നതിൽ ബൈബിൾ നൽകുന്ന നിർദേശങ്ങൾ ഇന്നും പ്രസക്തമാണ്.
- സ്നേഹത്തോടെ വളർത്തുക: എഫെസ്യർ 6:4 മാതാപിതാക്കൾ കുട്ടികളെ കോപിപ്പിക്കാതെ കർത്താവിന്റെ ബാലശിക്ഷയിലും പത്ഥ്യോപദേശത്തിലും വളർത്തണമെന്ന് പഠിപ്പിക്കുന്നു.
- ശരിയായ വഴി കാണിക്കുക: സദൃശവാക്യങ്ങൾ 22:6 കുട്ടിയെ അവൻ നടക്കേണ്ട വഴിയിൽ അഭ്യസിപ്പിക്കണമെന്ന് ഉപദേശിക്കുന്നു.
- സഹിഷ്ണുതയോടെ പെരുമാറുക: കൊലൊസ്സ്യർ 3:21 മക്കളെ മുഷിപ്പിക്കരുതെന്ന് മാതാപിതാക്കളെ ഓർമിപ്പിക്കുന്നു.
- നല്ല മാതൃകയാകുക: കുട്ടികൾ മാതാപിതാക്കളുടെ വാക്കുകളേക്കാൾ അവരുടെ ജീവിതശൈലിയിൽനിന്നാണ് കൂടുതൽ പഠിക്കുന്നത്.
പ്രാർത്ഥനയും കുടുംബാരാധനയും ദൈവവചനപഠനവും കുടുംബബന്ധങ്ങളെ ശക്തിപ്പെടുത്തുന്ന ആത്മീയ ശീലങ്ങളാണ്.
കുട്ടികളെ നമ്മുടെ ഇഷ്ടത്തിനനുസരിച്ച് വളർത്തുകയല്ല, മറിച്ച് അവർക്ക് ലഭിച്ചിരിക്കുന്ന കഴിവുകളും വ്യക്തിത്വവും തിരിച്ചറിഞ്ഞ് ഉത്തരവാദിത്തമുള്ള മനുഷ്യരായി വളരാൻ സഹായിക്കുകയാണ് മാതാപിതാക്കളുടെ കടമ.
കുട്ടികൾക്ക് വിലകൂടിയ സമ്മാനങ്ങളേക്കാൾ ആവശ്യം മാതാപിതാക്കളുടെ സമയവും ശ്രദ്ധയും സ്നേഹവും അംഗീകാരവുമാണ്. അവരുടെ വാക്കുകൾ കേൾക്കാനും സംശയങ്ങൾ മനസ്സിലാക്കാനും തെറ്റുകൾ തിരുത്താനും മാതാപിതാക്കൾ സന്നദ്ധരാകണം.
നല്ല മാതാപിതാക്കൾ കുട്ടികൾക്ക് നല്ല ജീവിതസൗകര്യങ്ങൾ ഒരുക്കുന്നവർ മാത്രമല്ല; നല്ലൊരു ജീവിതം നയിക്കാൻ അവരെ പ്രാപ്തരാക്കുന്നവരുമാണ്.
സ്നേഹത്തിൽ വേരൂന്നി, വിശ്വാസത്തിൽ വളർന്ന്, മൂല്യങ്ങളിൽ ഉറച്ചുനിൽക്കുന്ന ഒരു തലമുറയെ വാർത്തെടുക്കുക എന്നതായിരിക്കട്ടെ ഓരോ ക്രൈസ്തവ മാതാപിതാക്കളുടെയും ലക്ഷ്യം.
